【 樂區膠悠遊 Loco vlog #29 】實踩: 沙田體育會水上活動中心 至 大圍站 段

上一集教左大家由科學園黎到沙田體育會水上活動中心，
今日我哋再次出發，向大圍站前進！

路線｜
沙田體育會水上活動中心 > 大涌橋路 > 沙田會所1號 水中天 > 大圍站

相信唔係呢區嘅居民可能比較少踩呢一邊嘅單車徑，呢邊單車徑嘅景觀都唔錯架，可以望到整個馬場景觀，黃昏時分特別chill！

再沿單車徑踩就會見到沙田地標之一 沙田畫舫
沙田畫舫係香港昔日嘅一座海上畫舫，1960年代停泊喺沙田海近沙田墟一帶，至1970年代香港政府發展沙田新市鎮需要喺沙田海填海，而被迫遷離

直至1986年，敦煌酒樓集團喺沙田城門河畔興建一艘固定石舫代替昔日嘅沙田畫舫，2002年改為明星海鮮舫，2018年翻新為婚宴場地，翻新後外觀大致保留原有面貌，下次經過不妨可以打個卡

打完卡就繼續沿城門河嘅東岸踩，東岸會比較多高低起伏嘅路段，大家踩嘅時候要小心呀～

過左乙明、曾大屋會有一段連續落斜及上斜，落斜前記得先試煞車，如果體力欠佳嘅話記得喺安全情況下落車推車

黎到今次嘅終點～大圍站，呢度係比較繁忙嘅單車徑，除左小心多車之外，仲要小心行落單車徑嘅行人呀～