【樂區膠悠遊 Loco vlog #13】實踩: 大埔墟站 至 大埔三門仔路 段

大埔區有完善嘅單車網絡，由大埔墟站至大尾督一段更加係周末熱門踩車路線，
但未必人人都熟路，今日就帶大家由大埔墟站出發，途經花園農莊打下卡，同埋亞洲著名賞蝶地點，最後去三門仔睇日落！

路線｜
大埔墟站 > 蝶豆花園農莊 > 鳳園蝴蝶保育區 > 大埔三門仔路

蝶豆花園農莊
農莊佔地50萬呎，園內有多個打卡位：天鵝湖觀光船、天空之鏡、夢幻風車、花海等，仲有6隻來自澳洲嘅得意小羊駝
踩到攰想補給下嘅朋友不妨試下園內嘅蝶豆花小食同特飲，補充體力再出發！

Photo credit: moannaxdessire @IG

入場收費詳情：蝶豆花園 Butterfly Valley

鳳園蝴蝶保育區
鳳園蝴蝶保育區係亞洲區著名賞蝶地點，裏面有超過200種蝴蝶，包括裳鳳蝶、燕鳳蝶，園內環境清幽，所以吸引唔少攝影愛好者前來取景，想去嘅話只要係汀角路轉入鳳園路直行，過咗藍色小橋就到㗎啦!

photo credit：鳳園蝴蝶保育區

小提示:鳳園蝴蝶保育區只限會員才能內進參觀，但唔洗失望，只需HKD$20，就可以喺到訪當天成為臨時會員㗎啦

三門仔
三門仔係一條歷史悠久嘅漁村，除左可以黎到魚排釣魚之外，仲可以欣賞埋日落，平靜嘅海面上有幾艘小艇停泊，充滿漁村風味
有時間嘅朋友不妨去埋鄰近嘅馬屎洲，佢有全海景嘅山路，只要跨過小山丘同連島沙洲就到，咁就可以黎番個生態地質之旅！

Photo credit: cloudy_little, orangegrape_melon @IG

注意事項：

1. 大埔東消防局一段為長斜路，上斜落斜都要小心呀～
2. 馬屎洲夜晚沿路冇街燈，記得天黑前回程
3. 打卡同時都要顧及居民嘅感受，踩完記得泊番喺單車停泊處，唔好留低單車喺村入面呀