【 樂區膠悠遊 Loco vlog #97 】實踩: 屯門站 至 三聖 段

「屯馬單車徑」已經係2020年9月正式啟用，沙田、馬鞍山至大埔段大家應該都踩到滾瓜爛熟，
咁屯門又有咩好去處呢？今集 #樂區膠悠遊 帶大家由屯門站踩到去屯門「隱世」小漁村三聖

路線｜屯門站 ＞ 后角天后廟、天后廟廣場 ＞ 三聖

由杯渡路單車泊位出發，沿住屯門河踩


好快就黎到后角天后廟、天后廟廣場
后角天后廟 建於明初（1368年），至今已有六百幾年歷史，係香港最古老嘅天后廟之一
而宜家見到嘅天后廟廣場同花炮展覽館就係2013年新建，館內仲有三個實物大小嘅花炮供市民觀賞

位於青山灣東南岸嘅三聖墟，曾經係香港一個知名嘅漁村，地理位置優越，係一個天然嘅避風港
雖然後來因發展新市鎮而需要填海，但區內仍然保留左唔少歷史古蹟：炮台古蹟、麒麟石、三聖廟和三州媽廟等

今日嘅三聖海鮮街，係遊客必到之地，共有十數檔海鮮檔，各有特色，食客可以喺海鮮檔購買完海鮮，再交由附近嘅餐廳代為烹煮

除左食海鮮之外，去到附近嘅青山灣散散步都係個唔錯嘅選擇
長達800米嘅青山灣海濱長廊，可以飽覽避風塘同屯門海岸景色，一艘艘漁船停泊，日落時分更有風味