【 樂區膠悠遊 Loco vlog #78 】實踩: 上水單車匯合中心 至 聯和墟 段

疫情底下，單車成為熱門活動之一
粉嶺 - 可以話係一直只被視為中途站
最多人踩嘅可能係踩去上水、屯馬單車徑嘅一段
今集樂區膠悠遊帶大家深入北區，由上水匯合中心踩去聯和墟！

路線：上水單車匯合中心 ＞ 北區運動場 ＞ 黃帝祠 ＞ 聯和墟

新界單車徑網絡上水至元朗段已經係2020年9月正式啟用！
今集我哋就由其中一個休息處 上水單車匯合中心 出發


繼續沿馬會道踩，經過天平邨發現一幅有趣壁畫
雖然唔係華麗嘅大畫作，但用一格格代表一個個家庭，相當有創意

呢個迴旋處相信曾經考起過唔少區外人，認住「安樂邨」路牌

沿住單車徑踩，相信都會比呢座七層建築物所吸引目光，到底呢座係咩建築物呢？
呢座樓高七層嘅建築原來就係「黃帝祠」，前身係建於1925年嘅軒轅祖祠，
曾經喺新界北區粉嶺各姓鄉民祭祀同議事嘅公祠，亦為新農學校
2000年由新界龍躍頭鄧氏族人集資拆卸重建，正名為「黃帝祠」
佢仲係華南首間具規模嘅軒轅黃帝紀念建築

離開黃帝祠，過埋隧道就到聯和墟啦
留意呢條隧道較多彎位，除左小心行人之外，仲要小心對面落斜嘅單車呀

講到聯和墟，相信唔少人都會諗起「聯和市場」
市場於1951年啟用，以三合土建造，共有60個檔位，當年除左現存嘅建築外仲有露天巿場
2002年由公營嘅聯和街市取代，並於同年9月26日停止運作
未來聯和市場將變身成「城鄉生活館」，推廣本地農產品，並設立社區小店、攤檔以及不定期墟市


雖然聯和市場仲未變身，不如聯和墟仲有唔少隱藏小食架
多間街坊小店任你揀：鹹牛肉蛋多士、原隻豉油雞脾包、長期有人排隊20年腸粉店等